ඩඩ්ලිට රෝල්ස් රොයිස් ගේන්න රේගුවට බොරු කියලා..ලෝකෙට 25 කතාවත් බොරුවක්..

රටම හදුනන ව්‍යාපාරික ඩඩ්ලි සිරිසේන විසින් මෑතකදී මෙරටට ආනයනය කරන ලද ‘රෝල්ස් රොයිස් ෆැන්ටම්’ (RollsRoyce Phantom) වර්ගයේ සුඛෝපභෝගී මෝටර් රථය සඳහා ශ්‍රී ලංකා රේගුව විසින් රුපියල් මිලියන 70ක දඩයක් පනවා ඇති බව economynext වාර්තා කර තිබෙනවා.

එලෙස දඩය පැනවීමට හේතු වී ඇත්තේ, රථයේ මාදිලිය පිළිබඳව වැරදි තොරතුරු ප්‍රකාශ කිරීමයි.

එමෙන්ම වටිනාකම සැඟවීම අදාළ ආනයනකරු විසින් මෙම රථය ‘Rolls
Royce Phantom Auto’ මාදිලිය ලෙස ප්‍රකාශ කර තිබූ අතර, එහි වටිනාකම එක්සත් රාජධානියේ සියයට 20ක බදු ද ඇතුළුව ස්ටර්ලින් පවුම් 417,000ක් ලෙස දක්වා තිබුණි.

නමුත්, රේගු නිලධාරීන් විසින් සිදු කරන ලද පරීක්ෂාවන්හිදී අනාවරණය වී ඇත්තේ මෙම රථය ‘ExtendedWheelBase’ (EWB) හෙවත් රෝද අතර පරතරය වැඩි සහ දිගින් වැඩි මාදිලියක් බවයි.

එවැනි රථයක සැබෑ වටිනාකම ස්ටර්ලින් පවුම් 479,000ක් පමණ වන බවයි නිලධාරීන් පෙන්වා දෙන්නේ.

මෙම වැරදි ප්‍රකාශය හේතුවෙන් පනවන ලද රුපියල් මිලියන 70ක දඩය ද ඇතුළුව ආනයනකරුට රුපියල් මිලියන 370ක මුළු මුදලක් ගෙවීමට සිදුව ඇති බවයි වාර්තා වන්නේ.

මේ අතර, ව්‍යාපාරික ඩඩ්ලි සිරිසේන විසින් සිදුකළ සමාජ මාධ්‍ය සටහනක් හේතුවෙන් මෙම රථය ලොව පුරා ඒකක 25ක් පමණක් නිෂ්පාදිත ‘Centenary’ මාදිලියේ රථයක් බවට මතයක් පැතිර ගොස් තිබෙනවා.

කෙසේ වෙතත් මෙය ‘Centenary’ මාදිලියක් නොවන බවට රේගු නිලධාරීහු විශ්වාස කරනවා.

යම් හෙයකින් මෙය එවැනි සීමිත මාදිලියක් බව තහවුරු වුවහොත්, එහි බදු මුදල පමණක් රුපියල් බිලියනය ඉක්මවනු ඇති බවයි වාර්තා වන්නේ.