ගොසිප් පුවත්

අන්තිම නිවේදනය දෙන්නේ – ගුරුවරුන් හෙට 21 පාසල් නාවොත් පඩි කපනවා

වසර එක හමාරකට පසුව පාසල් යළි විවෘත කිරීමට යන අවස්ථාවේදී පාසල්වලට නොපැමිණෙන ගුරුවරුන්ගේ සහ විදුහල්පතිවරුන්ගේ නොවැම්බර් මස වැටුප අත්හිටුවීමට පියවර ගන්නා බව වයඹ පළාත් ආණ්ඩුකාර රාජා කොල්ලුරේ මහතා පැවසීය.

පාසල් විවෘත කිරීමේ කටයුතුවලට බාධා කරන සහ විරුද්ධව ක්‍රියා කරන පිරිස්වලට එරෙහිව දැඩි නීතිමය ක්‍රියාමාර්ග ගන්නා බවද ආණ්ඩුකාරවරයා සඳහන් කළේය.

පාසල් විවෘත කරන්නේ 21 වැනිදා වුවත් ගුරු සංගම් පවසන පරිදි ගුරුවරුන් පාසලට පැමිණෙන්නේ 25 වැනිදා බව කී ආණ්ඩුකාරවරයා එම යෝජනාව හකුලාගෙන 21 වැනිදාම පාසලට පැමිණෙන්නට සිතුවොත් හොඳයි යනුවෙන් ද කීවේය.

රාජා කොල්ලුරේ මහතා මේ බව පැවසුවේ කුරුණෑගල වැව රවුමේ පිහිටි ආණ්ඩුකාර නිල නිවසේදී මාධ්‍ය වෙත අදහස් දක්වමිනි.

පාසල්වලට පැමිණ විනය විරෝධී ක්‍රියා කරන්නට කිසිවෙක් හෝ උත්සාහ කළහොත් එයට ඉඩනොදෙන බවත්, පාසල් විවෘත කිරීමට විරුද්ධවීම දේශද්‍රෝහී, සාපරාධී මෙන්ම ජනතාද්‍රෝහී ක්‍රියාවක් බව ද පැවසීය.

මෙය රටේ පාසල් දරුවන්ගේ අනාගතය පිළිබඳව කටයුත්තක් මිස වෙනත් ප්‍රශ්නයකට සම්බන්ධ කාරණයක් නොවන නිසා පාසල් යළි විවෘත කිරීමේ කටයුතුවලට රටේ සියළුම ජනතාවගේ ආශිර්වාදය හිමිව ඇතැයි ද පැවසීය.

කම්කරු නීතිය අනුව වර්ජනයක් පවතින අවස්ථාවේදී වර්ජකයන්ට වැටුප් ගෙවන්නේ නැති බවත්, වර්ජනයෙන් පසුව අවශ්‍ය නම් වැටුප් ලබා ගැනීමට හැකි බවත්, එය තමන් නීතිඥවරයකු ලෙස දන්නා බවත් ආණ්ඩුකාරවරයා සඳහන් කළේය.

පුෂ්පකුමාර ජයරත්න සහ අජන්ත රත්නායක

Back to top button