තරු හුට පට

විවාහ දිවියට පිවිසුණු දුලානි අනුරාධාගේ කවුරුත් නොදන්න ආදර කතාව මෙන්න

“එයා බැරියර්ස් දාගෙන ඒක එපා, මේක එපා කියන කෙනෙක් නෙවේ…”

 

“හිතපු විදිහ මේක නෙවෙයි. කොරෝනා නිසා අපට ගොඩක් බාධක ආවා…”

 

“එදා මට ඒ අයගෙ ආදරේ හොඳින්ම දැනුණා…”

 

දුලානි අනුරාධා කියන්නෙ ඇය රංගනයෙන් දායක වුණු පළමුවැනි චිත්‍රපටය හරහාම සම්මානයට පාත්‍ර වුණු දක්ෂ සහ ජනප්‍රිය රංගන ශිල්පිනියක්. බොහෝ දෙනාගේ ආදරය දිනාගත් මේ රුවැත්තිය සැප්තැම්බර් 29 වැනිදා සුන්දර මනාලියක් ලෙසින් සැරසී විවාහ දිවියට ඇතුළත් වුණා.

 

පවුලේ සාමාජිකයන් සහ කලාකරුවන් සීමිත පිරිසකගේ සහභාගිත්වයෙන් කොළඹ සිනමන්ග්‍රෑන්ඩ් හෝටල් පරිශ්‍රයේ පැවැති විවාහ උත්සවයෙන් පසුව ඇය සතිඅන්ත පුවත්පතක් සමඟ කළ කතාබහක් මේ…………….

 

කොහොමද අලුත් ජීවිතේ?

තාම එහෙම ලොකුවට කියන්න බෑ ඉතින්. හීනයක් වගේ තමයි දැනෙන්නේ.

 

විවාහය පරක්කු කළේ ගැළපෙන කෙනෙක් හම්බුණේ නැති නිසාද?

ඔව් ඉතින්. මෙහෙමයි හැමෝගෙම ජීවිතේ හැමදේම එකම වෙලාවට වෙන්නෙ නෑනේ. මං හිතන්නේ මගෙ ජීවිතේ විවාහය කියන දේ වෙන්න මේ තමයි හරිම වෙලාව.

 

ඔබේ ආදරණීය සැමියා ගැනත් කතා කරමු නේද?

එයා අශෝක් සේනාධීර. නාවික හමුදාවේ කමාන්ඩර් කෙනෙක් විදිහට සේවය කරනවා. ගෙවල් මාවනැල්ලේ. මට එයාව මුණ ගැහෙන්නෙ යාළුවකුගේ යාළුවෙක් මාර්ගයෙන් පැමිණි විවාහ යෝජනාවක් හරහායි.

 

ඉන් පසුව එය විවාහය දක්වා පැමිණි ආකාරය මතක් කළොත්?

මුලින්ම අපි මේ පිළිබඳව ගෙවල්වලට කිව්වා. ඉන්පසුව කේන්දර බලලා දෙපැත්තේම කැමැත්ත එක්ක විවාහ වෙන්න ඉක්මනින්ම තීරණය කළා. ලොකු කාලයක් ගියේ නෑ. ඉක්මනින් හැමදේම සිද්ධ වුණා. එයාගෙ පවුලෙ සහෝදර සහෝදරියෝ පස් දෙනෙක් ඉන්නවා. නංගියි, අක්කලා දෙන්නයි, අයියා කෙනකුයි ඉන්නවා. අපේ පවුලේ ඉන්නේ මමයි අයියයි විතරයිනේ. ඉතින් එයාලා ලොකු පවුලක් නිසා වෙනසක් තියෙනවා.

 

ඉදිරියේදී ඔබ සැමියා සමඟම පදිංචියට යනවාද?

ස්ථිරව ඉන්නෙ කොහෙද කියල තාම තීරණය කරල නැහැ. මොකද මගෙ ගුරු වෘත්තියේ කටයුතු සහ කලා කටයුතු එක්ක මට කොළඹ ආසන්නයේ කොහෙ හරි ඉන්න වෙනවා. ඉතින් මගෙ නිවසක් තියෙනවා පානදුරේ. මගේ අම්මා, තාත්තා එක්ක ඉන්නත් පුළුවන්. බලමු ඉස්සරහට.

 

හිතේ හිටිය කෙනාවම හම්බුණා කියලා හිතනවද?

මෙහෙමයි. මම විවාහ වෙන්න ඕන මෙහෙම කෙනෙක් එක්ක කියල ලොකු දේවල් මවාගෙන හිටිය කෙනෙක් නෙවේ. විවාහය කියන ගැඹුරු බැඳීමට යන්න පුළුවන් කෙනා මුණ ගැහුණම විවාහ වෙනවා කියලා තමයි හිතුවේ. සමහර විට අපි පොඩි කාලෙ හිතපු දේවල් වෙනස් වෙන්න පුළුවන්. පාසල් යන කාලෙදි සහ කැම්පස් යන කාලේදි අපි තුළ තිබුණු සිතුම් – පැතුම් කාලෙත් සමඟ වෙනස් වෙනවානේ. මූලිකව විවාහය කියන තැනට යන්න පුළුවන් කියන විශ්වාසය තිබුණු නිසා අපි දෙන්නම එකට එකතු වෙලා ඒ තීරණයට ආවා.

 

පෙර සිටම සැලසුම් කරලා තිබුණේ සීමිත පිරිසක් සමඟ විවාහ උත්සවය පවත්වන්නද?

නෑ. අපි කරන්න හිතපු විදිහ මේක නෙවෙයි. කොරෝනා නිසා අපට ගොඩක් බාධක ආවා. හැබැයි ගෙදර අයත් එක්කත් කතා කරලා විවාහය මේ විදියට කළා. ඇත්තටම ක්ෂේත්‍රයේ අය සහ නාවික හමුදාවේ එයාගෙ යාළුවො ගොඩක් එක්කයි අපි විවාහ උත්සවය ගන්න හිටියේ. හැබැයි පුළුවන් ප්‍රමාණය සහභාගි කරගෙන සතුටින් අපි විවාහ උත්සවය පැවැත්තුවා.

 

විවාහය සම්බන්ධ අනිකුත් කටයුතු සැලසුම් කළ අයුරින්ම සාර්ථකව කරගන්න පුළුවන් වුණාද?

ඔව්. මම කොහොමත් ආස චාම් විදිහට මේ දේවල් කරන්න. ඉතින් බලාපොරොත්තු වුණු විදිහටම ලස්සනට අපි වෙඩින් එක ගත්තා. අඩුවකට තිබුණේ මගේ සහෘදයෝ ගොඩ දෙනෙක්ව සහභාගි කරගන්න බැරිවුණු එක විතරයි.

 

වෙඩින් එක වෙනුවෙන් මහන්සි වුණේ කවුද?

ඇත්තටම මට උදවු කළ මගෙ සියලුම යහළුවන්ව මතක් කරන්න ඕනි. එයාලා නැත්නම් මට මේ තරම් හොඳට වෙඩින් එක කරන්න වෙන්නෙ නැති වෙයි. විශේෂයෙන් මධු සහ ධනුෂ්ක ඒ වගේම අපේ පවුල් දෙකේ හැමෝමත් ගොඩක් උදවු කළා. තව විශේෂ දෙයක් කියන්න ඕන. මාලනී ෆොන්සේකා වැනි ජේ‍යෂ්ඨ කලාකරුවන් මගෙ ආරාධනය භාරගෙන රටේ පවතින තත්ත්වය පිළිබඳවත් නොහිතා මගේ වෙඩින් එකට සහභාගි වුණා. එදා මට ඒ අයගෙ ආදරේ හොඳින්ම දැනුණා. ඒ වගේම මට ලස්සන කේක් නිර්මාණයක් කරලා දුන්නු ඔරෙන්සි සිරිවර්ධනත්, Designer Wedding Sri Lanka එකේ සිසිරවත් මතක් කරන්න ඕනේ.

 

සැමියා කැමතිද ඔබ දිගටම කලා කටයුතුවල නිරත වෙනවාට?

ඔව්. එයා කලාව රසවිඳින කෙනෙක්. ඒ වගේම කලා ක්ෂේත්‍රය පිළිබඳව ලොකු අවබෝධයක් තිබෙන කෙනෙක්. එහෙම බැරියර්ස් දාගෙන ඒක එපා, මේක එපා කියන කෙනෙක් නෙවේ. මම ගුරුවරියක් නිසා එයා දන්නවා මම ගුරු වෘත්තියේ ගෞරවය රැකෙන අයුරින් රංගන කටයුතුවල නිරත වන බව.

 

ඉස්සරහට එන්න තිබෙන අලුත් නිර්මාණ මොනාද?

කලින් රඟපාපු චිත්‍රපට කිහිපයක් ඒන්න තියෙනවා. හැබැයි කියන්න කනගාටුයි රටේ පවතින තත්ත්වයත් සමඟ ඒ පිළිබඳ ලොකු බලාපොරොත්තුවක් තියාගන්න බැහැ. ඒ නිර්මාණ කවදා ප්‍රේක්ෂකයන් අතරට ගෙනියන්න පුළුවන් වේවිද කියලා. මේ ආර්ථික තත්ත්වයත් සමඟ නිෂ්පාදකවරුනුත් නිර්මාණ කරන්න අඩුවෙන් තමයි ඉදිරිපත් වෙන්නේ. ටෙලි නාට්‍යවල වැඩ නම් කෙරීගෙන යනවා.

 

මොනාද ඉදිරි බලාපොරොත්තු?

තනියම හිටියට වඩා ජීවිතේ ඉස්සරහට ටිකක් වෙනස් වෙයි. තවම විවාහ වෙලා දවස් කිහිපයයි නේ. මේ දවස්වල හරි සුන්දරව කාලය ගෙවෙනවා. දෙන්නත් එක්ක එකතු වෙලා ඉස්සරහට යන එක තමයි මේ වෙලාවේ තියෙන ලොකුම අභියෝගය. ඉතින් ඒක ජයගන්න තමයි උත්සාහ කරන්නේ.

 

මෙම ලිපියේ සම්පූර්ණ උපුටා ගැනීම “මව්බිම” පුවත්පතේ “හදගැස්ම” අතිරේකයෙන්….

Leave a Reply

Your email address will not be published. Required fields are marked *

Back to top button