ගොසිප් පුවත්

දිනකට ලක්ෂ 10ක් වියදම් කරගෙන හැරී-මේගන් රකින්නේ මොකක්ද?

බ්‍රිතාන්‍යය රජ පවුලේ උදවිය අතරින් හැරී සහ මෙගන් දෙදෙනා මේ කාලයේ නිතර පුවත් මවන යුවළක් බව රහසක් නොවෙයි.

ඔවුන් පසුගිය වසරේ රජ පවුලේ ජේ‍යෂ්ඨ සාමාජිකත්වයෙන් ඉවත් වීමෙන් පසු මෙම යුවළ ගැන යොමුවන මාධ්‍ය අවධානය තවත් වැඩි වී ඇති ආකාරයක් පෙනෙනවා.

රජ පවුලෙන් ඈත් වීමෙන් පසු හැරී සහ මෙගන් දෙදෙනා මේ වනවිට ජීවත් වන්නේ බ්‍රිතාන්‍යයේ නොවෙයි.

ඔවුන් දැන් ටික කලෙක සිට පදිංචි වී සිටින්නේ ඇමෙරිකාවේ ලොස් ඇන්ජලීස් නුවර සුප්‍රකට බෙවර්ලි හිල්ස් ප්‍රදේශයේයි.

කලින් ටික දවසක් කැනඩාවේ වැන්කුවර්හි පදිංචිව සිටි ඔවුන් මීට සති කිහිපයකට පෙර ඇමෙරිකාවට පැමිණියා.

මෙගන් මාර්කල් ඇමෙරිකානු කාන්තාවක බවත් කවුරුත් දන්නා කාරණාවක්.

හැරී-මෙගන් යුවළ ගැන මේ වනවිට පළමුවැනි අලුත්ම පුවත ඔවුන්ගේ ආරක්‍ෂාව සම්බන්ධ පුවතක්.

රජ පවුලේ ජේ‍යෂ්ඨ සාමාජිකයන් ලෙස සිටියදී ඔවුන්ට එහි ප්‍රධාන සාමාජිකයන්ට ලැබෙන ආරක්‍ෂාව කොහොමටත් ලැබුණා.

නමුත් රජ පවුලෙන් ඈත් වීමෙන් පසු එම ආරක්‍ෂාව නොලැබෙන නිසා ඔවුන් දෙදෙනාගේ සහ මේ වනවිට වසරක් වයසැති ඔවුන්ගේ පුතු ආචි ගේ ආරක්‍ෂාව සම්බන්ධ ගැටලුවක් මතුව තිබුණා.

ඔවුන්ට ආරක්‍ෂාව සපයන්නේ කවුද, ඒ සඳහා මුදල් ගෙවන්නේ කවුද වැනි ප්‍රශ්න ගැන නිතර මාධ්‍ය තුළ කතාබහ වුණා.

මෙසේ තිබියදී පසුගියදා බ්‍රිතාන්‍ය මාධ්‍ය අනාවරණය කර තිබුණේ ඇමෙරිකාවේ ඉහළම පෙළේ ආරක්‍ෂක සමාගමකට ඔවුන් මෙම කටයුත්ත භාරදී ඇති බවයි.

Gavin de Becker & Associates නමින් හැඳින්වෙන මෙම සමාගම ඇමෙරිකාවේ සුප්‍රකට නළු නිළියන්, ධනපතියන් වැනි අයගේද ආරක්‍ෂාව සඳහා වගකියන ප්‍රසිද්ධ සමාගමක් බවයි පැවැසෙන්නේ.

ලෝකයේ අංක එකේ ධනවතා වන ජෙෆ් බෙසෝස්, සුප්‍රකට හොලිවුඩ් නළු ටොම් හෑන්ක්ස් වැනි අයටද ආරක්‍ෂාව සපයන්නේ මෙම සමාගමේ ආරක්‍ෂකයන් බව මාධ්‍ය සඳහන් කර තිබුණා.

මෙවැනි ඉහළම පෙළේ පුද්ගලයන් සහ පවුල් 90කට පමණ මෙම සමාගම ආරක්‍ෂාව සපයන බව සඳහන්.

කෙසේ වෙතත් කාගේත් අවධානය දිනාගත් කාරණයක් වී තිබුණේ මෙම ආරක්‍ෂක සමාගමට හැරී-මෙගන් යුවළ ගෙවන ගාස්තුවයි.

තමුන්ට ආරක්‍ෂාව සැපයීම වෙනුවෙන් දිනකට ස්ටර්ලිං පවුම් 7,000ක පමණ මුදලක් ඔවුන් ගෙවන බවයි මාධ්‍යවල විශ්වාසය වන්නේ. එය ලංකාවේ රුපියල්වලින් දිනකට ලක්‍ෂ 16කට ආසන්න මුදලක්. වසරකට එය රුපියල්වලින් කෝටි 60කට කිට්ටුයි.

හැරී සහ මෙගන් මේ තරම් මුදලක් ගෙවන්නේ කෙසේද යන්න සම්බන්ධයෙන්ද බොහෝ දෙනෙකු ප්‍රශ්න කර තිබෙනු දැකිය හැකි වුණා.

එය ඔවුන්ගේ පෞද්ගලික මුදල්වලින් ගෙවනු ඇති බව මේ දෙදෙනාගේ හිතවතුන් පවසා තිබුණත් ඒ ගැන වැඩි විස්තරයක් සඳහන් වුණේ නැහැ.

මේ වනවිට හැරී, මෙගන් සහ ආචි තිදෙනා පදිංචිව සිටින සුවිසල්, සුඛෝපභෝගී නිවෙස පිළිබඳවද තොරතුරු පසුගිය දිනවල මාධ්‍ය තුළ පළ වී තිබුණා.

ලොස් ඇන්ජලීස්හි අතිශය සුන්දර ඉසව්වක, අක්කර 22ක භූමි භාගයක පිහිටා ඇති මෙම මන්දිරය ඇමෙරිකානු ඩොලර් මිලියන 18ක් (ලංකා රුපියල් කෝටි 300ක්) පමණ වටිනා එකක් බවයි පැවැසෙන්නේ.

සුවිසල් නිදන කාමර 8ක්, සුපිරි නාන කාමර 12ක් ඇතුළු අංග රැසකින් එය සමන්විත බව සඳහන්.

ඇමෙරිකාව තුළ කොරෝනා වසංගතය තවමත් වේගයෙන් පැතිරෙමින් ඇති පසුබිම තුළ හැරී, මෙගන්, ආචි තිදෙනා මෙහි ආරක්‍ෂිතව, හුදෙකලාව කාලය ගත කරන බව පැවැසෙනවා.

ඔවුන් තවමත්  මෙම මන්දිරය මිලදී ගෙන නැති බවත්, එහි හිමිකරුවා ප්‍රකට නළුවකු, නිෂ්පාදකවරයකු වන ටයිලර් පෙරී බවත් මාධ්‍ය සඳහන් කර තිබුණා.

මේ වනවිට ඔවුන් එහි සිටින්නේ කුලී පදනම මත විය  හැකි බවයි සඳහන් වන්නේ. කෙසේ වෙතත්, හැරී සහ මෙගන් මෙම නිවෙස මිලදී ගැනීමට සැරසෙන බවටත් කතාවක් තිබෙනවා.

මෙගන්ගේ මව වන 63 හැවිරිදි ඩෝරියා රැග්ලෑන්ඩ්ද මේ වනවිට එම නිවෙසේ පදිංචියට පැමිණ ඇති බව මාධ්‍ය වාර්තා කර තිබුණා.

රජ පවුලෙන් ඈත්ව ජීවිතය අලුතෙන් පටන් ගැනීමෙන් පසු හැරී සහ මෙගන් ගත කරමින් සිටින තරමක් අස්ථාවර ජීවිතයට ඩෝරියාගෙන් විශාල ශක්තියක් ලැබෙන බවත්, ආචිගේ කටයුතුවලදීද ඇයගෙන් ලොකු උදව්වක් ලැබෙන බවත් සඳහන්.

Leave a Reply

Your email address will not be published.

Back to top button